ஐந்து வயது முதல் பதினாறு வயதுக்கு உட்பட்ட சிறார்களுக்கு கலைப் பயிற்சிகள் வழங்குதல், பொதுக்கல்வியுடன் கலைக்கல்வி வழங்குதல், சிறார்களிடம் மறைந்துள்ள கலைத்திறமைகளை வெளிக்கொணர வாய்ப்பளித்தல், கலைப்போட்டிகள் நடத்துதல் மற்றும் கலையால் சிறார்களை நல்வழிப்படுத்துதல் ஆகியவற்றை அடிப்படையாகக் கொண்டு தமிழ்நாடு ஜவகர் சிறுவர் மன்றம் 1979 ஆம் ஆண்டு சென்னையில் தொடங்கப்பட்டது. தற்போது மாநிலம் முழுவதும் 40 இடங்களில் மாவட்ட ஜவகர் சிறுவர் மன்றங்கள், விரிவாக்க மையங்கள், ஊரக மையங்கள் என செயல்பட்டு வருகிறது. மைய அரசின் மனிதவள மேம்பாட்டுத்துறையின் கீழ் செயல்படும் தேசிய சிறுவர் மன்றத்தின் நோக்கங்களை மாநில அளவில் தமிழ்நாடு ஜவகர் சிறுவர் மன்றம் செயல்படுத்தி வருகிறது.

ஜவகர் சிறுவர் மன்றத்தின் நோக்கங்கள்:-

• கலைக்கல்வி மற்றும் படைப்பாற்றல் ஆகியவற்றில் சிறார்களுக்கு வாய்ப்புகள் வழங்குதல்.
• சிறார்களுக்கு ஏனைய தளங்களில் கிடைக்காத அனுபவங்கள் மற்றும் செயல்பாடுகளை அவர்களுக்கு வழங்குதல்
• சிறார்களின் பாடத்திட்டம் மற்றும் பாடத்திட்டம் சாராத செயல்பாடுகளை வளப்படுத்த கலைக்கல்வி சேவைகளை வழங்குதல்
• பொழுதுபோக்கு மற்றும் உடல் திறன் செயல்பாடுகளின் மூலம் சிறார்களின் ஆளுமை திறமைகளை வளர்த்தல்
• அனைத்து தரங்களிலும் மற்றும் சமூகங்களில் சிறார்களிடையே சமூக மற்றும் கலாச்சார தொடர்புகளை மேம்படுத்துதல்
• மேற்கூறிய நடவடிக்கைகளை ஒரு இயக்ககமாக செயல்படுத்துதல்

தமிழகத்தில் தற்போது 40 இடங்களில் ஜவகர் சிறுவர் மன்றங்கள் மாவட்ட சிறுவர் மன்றங்கள், விரிவாக்க மையங்கள், ஊரக மையங்கள் என செயல்பட்டு வருகிறன்றன.

ஜவகர் சிறுவர் மன்றங்களின் பகுதிநேர கலைப்பயிற்சிகள்:-

சென்னை மயிலாப்பூர் ஜவகர் சிறுவர் மன்றத்தில் 13 வகையான கலைகளில் கலைப்பயிற்சியும், மாவட்ட ஜவகர் சிறுவர் மன்றங்களில் 4 வகையான கலைகளில் கலைப்பயிற்சியும் என குரலிசை, பரதநாட்டியம், கிராமிய நடனம், கைவினை, நாடகம், ஜிம்னாஸ்டிக்ஸ், மிருதங்கம், கராத்தே, கணினி, கீபோர்டு, வீணை, டிரம்ஸ், தையல், ஓவியம், திரைஅச்சு, யோகா மற்றும் சிலம்பம் ஆகிய கலைகளில் பகுதிநேர கலைப்பயிற்சி அளிக்கப்படுகிறது.